Çĕршывра çулсеренех чи чаплă шкулсене палăртаççĕ. Хуларисене тата ялтисене тĕрлĕрен хаклани те паллă. Асăннă рейтинг шкулсене малалла тата хăватлăрах ĕçлеме хистет, аталанма май парать.

Раççей регионĕсенчи ял шкулĕсен ятарлă рейтингне – ТОП-300-е – кашни çулах Чăваш Енри вĕренÿ учрежденийĕсем те кĕреççĕ. Хальхинче те республикăри 11 шкул вĕсен йышĕнче. Пĕри – Тăвайри пĕтĕмĕшле пĕлÿ паракан вăтам шкул. Унта çулсеренех шкул ачисене тарăн пĕлÿ пани палăрать.

Тăвай шкулĕсĕр пуçне асăннă рейтинга И.Я.Яковлев ячĕпе хисепленсе тăракан Элĕкри, Патăрьелĕнчи 1-мĕш номерлĕ, Патăрьел районĕнчи Митта Ваçлейĕ ячĕллĕ Первомайскинчи, Муркашри, Пăрачкаври, Красноармейски районĕнчи Тракри, Вăрмарти, Шăмăршăри, Елчĕкри тата Елчĕк районĕнчи Çирĕклĕ Шăхальти пĕтĕмĕшле пĕлÿ паракан вăтам шкулсем кĕнĕ.

Чăваш Енри 5 пĕтĕмĕшле пĕлÿ паракан учреждени вара Раççейри чи лайăх 500 шкул йышĕнче. Вĕсенче ăс пухакансем пĕлтĕрхи вĕренÿ çулĕнче пысăк çитĕнÿсем тунă. Шупашкарти 5-мĕш номерлĕ гимнази, 3-мĕш тата 44-мĕш лицейсем, Çĕнĕ Шупашкарти 18-мĕш лицейпа 6-мĕш гимнази çĕршыври чи чаплă шкулсенчен пĕрисем.
Тăвай шкулĕн тĕслĕхĕ районти ытти вĕренÿ учрежденийĕсене те пысăкрах çитĕнÿсем тума хавхалантарма пултарĕ. Эпир çакна шанса тăратпăр.